Que mecanismos cerebrais explican a falta de sensibilidade á música?

Ao redor dun 3-5% da poboación sa non experimenta sensacións  pracenteiras en resposta a ningún tipo de música; isto coñécese co nome de anhedonia musical específica.

“As persoas anhedónicas non teñen problemas para percibir e procesar correctamente a información contida nunha melodía (intervalos ou ritmos) e presentan unha resposta de pracer normal ante outro tipo de estímulos agradables (por exemplo, o diñeiro), pero non gozan cos estímulos musicais”, explica Noelia Martínez-Molina, científica do grupo de Cognición e Plasticidade Cerebral do Instituto de Investigación Biomédica de Bellvitge e da Universidade de Barcelona (IDIBELL-UB) e autora principal do estudo.

Aínda que xa se coñecía a existencia deste fenómeno, non se sabía cal era o motivo polo que se producía. O estudo, efectuado por este grupo de investigadores , en colaboración coa Universidade de McGill (Montreal) e publicado na revista PNAS dá pistas sobre a importancia da música a nivel evolutivo segundo a conexión entre as áreas auditivas e emocionais do cerebro e  determinan os mecanismos cerebrais que explican a falta de sensibilidade á música.

A diminución de resposta pracenteira ante a música dos participantes con anhedonia musical está relacionada cunha redución na actividade do núcleo accumbens, unha estrutura subcortical clave do sistema de recompensa. “Resulta interesante considerar a importancia evolutiva da conexión entre as áreas auditivas, corticais, e o sistema máis primitivo de avaliación emocional, subcortical”, comenta a investigadora. Esta conexión é moi clara nas persoas hedónicas musicais (as que gozan coa música) e en cambio atópase diminuída nas anhedónicas.

O vínculo entre áreas asegura que a música sexa experimentada como algo moi gratificante, á vez que asegura a súa importancia a nivel evolutivo, ata cando non parece evidente cal é a ganancia biolóxica desta produción cultural”, conclúe.